Partia Socialiste ka ngritur padi ndaj ish-kryeministri Sali Berisha. Padia është depozituar në Prokurorinë e Përgjithshme. Kallëzimi ndaj Berishës është depozituar nga deputeti Taulant Balla pas thirrjes së ish-kryeministrit për armatosje të popullit.
Të enjten e 21 prillit 2016, ish-kryeministri Berisha nga foltorja e Kuvendit u bëri thirrje shqiptarëve që të sigurojnë armë zjari për t’u mbrojtur nga organizatat kriminale që mbështeten nga qeveria.
“I sugjeroj qytetarëve të armatosen me armë për të mbrojtur pronat, bizneset, vatrat e tyre, sepse nuk kanë asnjë siguri, – theksoi Berisha. – Nëse kjo qeveri, si organizatë kriminale, kërcënon opozitën me banda kriminale, të jeni të bindur se shqiptarët do t’jua kthejnë me të njëjtën monedhë, ku nuk mund të gjeni dot vrimë miu ku të futeni. Duhet t’u jepet e drejtë qytetarëve të mbajnë armë, sepse me këtë organizatë kriminale nuk ka rend, nuk ka qetësi. E përsëris, shqiptarët të sigurojnë armë për t’u mbrojtur”-, tha atë ditë Berisha në Kuvend.
29 prill 2016 (gazeta-Shqip.com)