Policia e Tiranës jep detaje në lidhje me vetëplagosjen nga pakujdesia të 17-vjeçarit R.M., duke bërë të ditur gjithashtu se e ka arrestua rsë bashku me shokun e tij bashkëmoshatar, shtetasin M.Xh.
Arrestimi i adoleshentëve u bë pasi sot, rreth orës 12.30 të paradites, në ambientet e brendshme të një lokali në rrugën “Xhorxh Ë. Bush”, shtetasit R.M dhe M. Xh kanë qenë të ulur në katin e tretë në një tavolinë të këtij lokali dhe për një moment shtetasi R.M., ka hapur çantën e tij personale, ku brenda të cilës kishte një pistoletë të llojit “TT”, të cilën e mbante pa lejen e organeve kompetente dhe nga pakujdesia si pasojë e një shkrepje të pa vullnetshme është vetë-plagosur në këmbën e majtë, pa rrezik për jetën.
Ndërkohë shoku i tij me të cilin ishte në tavolinë shtetasi M. Xh, ka marrë armën dhe është larguar. Nga ana e shërbimeve të policisë është bërë e mundur kapja e shtetasit M. Xh, si dhe sekuestrimi në cilësinë e provës materiale i pistoletës tip “TT”.
Materialet i kalojnë për ndjekje të mëtejshme Prokurorisë Tiranë, për veprën penale “Prodhim dhe mbajtje të armëve luftarake dhe municionit”, për shtetasin R.M dhe për veprat penale “Moskallëzim krimi” dhe “ Veprime që pengojnë zbulimin e së vërtetës”, për shtetasin M. XH.
16 shtator 2016 (gazeta-Shqip.com)