Mediat belge kanë identifikuar atentatorin e tretë në aeroportin e Brukselit, i cili u filmua nga kamerat e sigurisë teksa ecte në krah të dy vëllezërve kamikazë.
Burri me kapele të zezë dhe veshje të bardhë dyshohet se është Faysal Cheffou, që ka punuar si gazetar i pavarur.
Lajmi është bërë me dije nga e përditshmja belge ‘Le Soir’, që nënvizon se lidhur me këtë çështje pritet edhe një konfirmim i fundit nga ana e prokurorisë. Cheffou, i arrestuar të enjten, është identifikuar falë dëshmisë së një taksisti, i cili të martën, ditën e sulmeve terroriste, e kishte shoqëruar atë në aeroportin e Zaventem.
Prokuroria ka konfirmuar arrestimin e Cheffou, i cili akuzohet për terrorizëm lidhur me sulmet e ndodhura në Bruksel më 22 mars.
26 mars 2016 (gazeta-Shqip.com)