Ankimet – Sot merret vendimi i shtatë anëtarëve. Zguri: Është hera e parë që na paraqiten kërkesa të këtyre përmasave
HERION MESI
Lëvizja Socialistë për Integrim i kërkon zyrtarisht Komisionit Qendror të Zgjedhjeve që zgjedhjet në Bashkinë e Vorës të shpallen të pavlefshme. Për këtë çështje, kjo forcë politike ka ankimuar rezultatin e zgjedhjeve vendore në KQZ, pasi, sipas LSI-së, në Bashkinë e Vorës ka pasur lista fiktive të zgjedhësve. Në kërkesën ankimore që kjo forcë politike ka depozituar në KQZ, pretendohet se humbja e kandidatit të Aleancës për Shqipërinë Europiane, Luan Sallaku, lidhet me listat fiktive të zgjedhësve në këtë bashki. Në kërkesën e LSI-së evidentohen dokumentet përkatëse që, sipas kësaj force politike, vërtetohet regjistrimi i qytetarëve në mënyrë të paligjshme, ndërkohë që i janë drejtuar edhe prokurorisë për të hetuar rreth kësaj çështjeje dhe ku është mbledhur informacioni i nevojshëm që vërteton këtë pretendim. Po ashtu, LSI-ja ngre në kërkesën e saj, që u pranua për shqyrtim nga institucioni më i lartë zgjedhor në vend, edhe shqetësimin e blerjes së votës në këtë bashki. “Në disa qendra votimi ka pasur votues fiktivë. Në Vorë rezulton se nga 29.09.2014-12.05.2015 janë regjistruar 745 shtetas, nga të cilët 587 ishin persona me të drejtë vote. Lejet e banimit për ta janë dhënë në kundërshtim me ligjin, ndërsa deklaratat noteriale janë bërë nga punonjës të bashkisë”, thuhet në ankimimin e LSI-së për zgjedhjet për Bashkinë e Vorës. Sipas Komisionit Qendror të Zgjedhjeve, ankimimi i Lëvizjes Socialiste për Integrim i përmbush të gjitha rregullat dhe në mbledhjen e djeshme, KQZ-ja vendosi me shtatë vota pro që kjo kërkesë do të shqyrtohet sot në mbledhjen e radhës, të datës 1 korrik. Në përfundim të numërimit të votave, fitues rezultoi kandidati i koalicionit të djathtë, Fiqiri Ismaili, me një diferencë të ngushtë, kundrejt kandidatit të LSI-së, Luan Sallaku. Situata parazgjedhore në Vorë u shoqërua me tensione, pas akuzave të LSI-së ndaj kandidatit Ismaili, për shtim fiktiv të listave të votuesve në këtë zonë zgjedhore. Për këtë arsye, kandidati i majtë, Sallaku, menjëherë pas mbylljes së numërimit të kutive, deklaroi se nuk e pranon rezultatin, duke u shprehur se nuk do ta njohë atë dhe do ta ankimonte atë. Kandidati i PD-së, Fiqiri Ismaili, fitoi me 230 vota më tepër në krahasim me kandidatin e ASHE-së të propozuar nga LSI-ja, Luan Sallaku, në zgjedhjet e mbajtura më 21 qershor, i cili mori 7916 vota, ndërkohë që Ismaili mori 8171 vota në këtë përballje për drejtimin e Bashkisë së Vorës.
Precedenti
Përtej vendimit për ta pranuar këtë kërkesë ankimore, kjo do të jetë hera e parë që Komisioni Qendror i Zgjedhjeve do të shqyrtojë një ankimim të këtyre përmasave. Në një prononcim dhënë dje për gazetën “Shqip”, anëtari më i vjetër i KQZ-së, Klement Zguri, theksoi se kemi të bëjmë me rastin e parë që një kërkesë e tillë i paraqitet KQZ-së. “Me sa kujtoj unë, nuk di që gjatë kohës që unë jam në këtë detyrë KQZ-ja të ketë shqyrtuar një kërkesë të përmasave të këtij lloji në historikun e saj të administrimit të proceseve zgjedhore. Them një kërkesë e këtyre përmasave, pasi kam parasysh se është hera e parë që administrata vihet në dispozicion të një ankimimi të bërë nga një parti politike. Kjo për faktin se LSI-ja në kërkesën e saj ankimore i ka vënë në dispozicion dhe listën e regjistrit të gjendjes civile, në një kohë që duhej të ishte KQZ-ja institucioni që, pasi ta shqyrtonte kërkesën në fjalë, të kërkonte një ndihmë nga institucionet e tjera, të cilat mund të kenë lidhje me këtë çështje, që të ndihmonin KQZ-në për një vendimmarrje sa më të drejtë. Pra, them se me një kërkesë të tillë KQZ-ja përballet për të parën herë. Ka pasur ankimime për dyshime lidhur me votime fiktive, por këto janë shqyrtuar dhe verifikuar nga KQZ-ja, jo e anasjella”, tha anëtari i KQZ-së, Klement Zguri.
Provat e LSI-së
Por nisur nga ky konstatim i anëtarit të KQZ-së, mund të vërehet qartë se në kërkesën e saj LSI-ja ka paraqitur pranë KQZ-së një sërë provash që pretendohet se provojnë paligjshmërinë e procesit zgjedhor të zhvilluar në Vorë. Dhe pjesa më e madhe e këtyre provave duket se janë siguruar nga institucionet shtetërore. Kështu, LSI-ja ka depozituar në KQZ prova si: praktikat e dhënies së lejeve të banimit në ZGJC Bashkia Vorë dhe lista e zgjedhësve në disa QV; informacion nga Prokuroria e Tiranës në lidhje me kallëzimin penal të bërë nga LSI-ja, si dhe dëshmitë e personave të pyetur me cilësinë e personave që kanë dijeni për ngjarjen; deklaratat noteriale të shtetasve që kanë vënë në dispozicion banesat e tyre për këta persona, të pajisur në mënyrë fiktive me leje banimi, të bëra para noterit Shaban Gjoka; vërtetimet e pronësisë të shtetasve që kanë vënë në dispozicion banesat e tyre për personat, të pajisur në mënyrë fiktive me leje banimi dhe certifikatat e tyre të gjendjes familjare; pamjet filmike të shtetasve të cilët kanë deklaruar në mediat vizive për mënyrën e pajisjes me leje banimi; lista e punonjësve të shoqërisë “Agro Blend” shpk, si dhe çdo dokument tjetër që vërteton marrëdhënien e biznesit të kësaj shoqërie me shoqëri të tjera në rrethe të ndryshme; lista e anëtarëve të skuadrës së futbollit “FK Vora” dhe certifikatat e tyre të gjendjes familjare; lista e punonjësve të Bashkisë Vorë dhe certifikatat e tyre të gjendjes familjare; emrat e drejtuesve të PD-së dega Vorë, certifikatat e tyre të gjendjes familjare, si dhe çdo dokument tjetër që vërteton lidhjen në gjini dhe krushqi me shtetasit që kanë vënë në dispozicion banesat e tyre personave të pajisur në mënyrë fiktive me leje banimi; faturat mujore të energjisë elektrike të shtetasve, që u kanë vënë në dispozicion banesat e tyre personave të pajisur në mënyrë fiktive me leje banimi; si dhe informacion nga Zyra e Punës Vorë, në lidhje me punësimin e shtetasve të ardhur.
Kurbini
Po sot, Komisioni Qendror i Zgjedhjeve do të shqyrtojë edhe kërkesën ankimore të Partisë Demokratike, që kërkon shpalljen të pavlefshme të zgjedhjeve në Kurbin, si dhe kërkesën për urdhërimin e përsëritjes së zgjedhjeve në këtë zonë zgjedhore. Vendimi u mor dy ditë më parë nga KQZ-ja, pasi kërkesa u konsiderua e vlefshme nga ky institucion.
Ky shkrim Beteja për Vorën, LSI-ja i kërkon KQZ-së pavlefshmëri dhe përsëritje të zgjedhjeve u publikua me pare te Gazeta SHQIP Online.